АҞӘА, лаҵара 30 - Sputnik. Аџьар Ҟаԥшь Жәларбжьаратәи Аилак адыррала 1860-ҩык хабарда ибжьаӡит ҳәа иԥхьаӡоуп Аԥсны жәлар Рџьынџьтәылатә еибашьра ашьҭахь.
Лаҵара 29 рзы Сҭампыл имҩаԥысит хабарда ибжьаӡыз ауаа рыԥшааразы Акоординациатә механизм 16-тәи аилатәара. Аилак аԥҵан 2010 шықәсазы.
Амеханизм аусура иалагазар аахыс иԥшаауп 526-ҩык рыԥсыбаҩқәа, урҭ рҟынтәи 285-ҩык рхаҭара шьақәыргыланы рҭаацәа ирыҭан ҳәа иҳәеит Аџьар Ҟаԥшь Аилак Кавказ иҟоу ахаҭарнак Анес Коту.