АҞӘА, рашәара 6 — Sputnik. Аԥсны раԥхьаӡа акәны адрон рхы иадырхәеит апальма зфо ахәаҷа ԥынҵахәхәа анарҵәаразы ҳәа арадио Sputnik иазеиҭеиҳәеит Аекологиаз аҳәынҭқарратә еилакы ахантәаҩы Савели Ҷыҭанаа.
Иара иажәақәа рыла, атәылаҿы зегь раасҭа ауадаҩра змоу ҭыԥуп Афон ҿыц аҳәынҭқарратә дача аҵакыра.
"Уа игылоу апальмақәа акыр рхыҵуеит, иҳаракуп. Адрон 40 литра рҟынӡа ахәшәеилашьшьыра шьҭнахыр алшоит, убри иабзоураны апальма ҳаракқәа рыхәышәтәразы иманшәалоуп", - ҳәа иҳәеит Ҷыҭанаа.
Ари аметод алҵшәа бзиа аанарԥшыр, анапылахәышәтәра инаваргыланы рхы иадырхәалоит.