АҞӘА, рашәара 7 — Sputnik. Аԥсны ахада Аконституциатә реформазы акомиссиа ажәалагалақәа ҳасаб рзуны Аԥсны Апарламент аҿы иахәаԥшразы инаишьҭыз Аконституциа аиҭакрақәа ралагаларазы азакәан апроект аус адулара иалагеит.
Иахьа имҩаԥысит абри азҵааразы аилацәажәарақәа ахада есымшатәи ихаҭарнак Баҭал Аиба, Иреиҳаӡоу аӡбарҭа ахантәаҩы Саида Быҭәԥҳа, Аконституциатә реформазы акомиссиа алахәылацәа Баҭал Табаӷәуа, Гиви Габниа, Асҭамыр Ҭаниа, Олег Папасқьыр алахәны.
Азакәан апроект иазԥхьагәанаҭоит:
Аԥсны ахада иаԥиҵо аколлегиатә усбарҭа - Аминистрцәа реилазаара аԥыхра;
аԥыза-министри аԥыза-министр ихаҭыԥуааи рмаҵурақәа раԥыхра;
Апарламент ақәыршаҳаҭны аминистрцәа рмаҵурақәа рахаргылара;
Апарламент ԥхьатәара ашьҭразы ахада азин иҭара, адепутатцәа ирыдгалоу аминистрцәа ркандидатурақәа хынтә мап анырцәырклак ашьҭахь амаҵурақәа 1/3 рыхәҭа ҭацәны иаанхазар;
анагӡаратә мчра ацентртә усбарҭақәа реилазаара ашьақәырӷәӷәаразы ахада азинмч иҭара;
ахада ихаҭыԥуаҩ изинмчқәа хаз игоу закәанла рышьақәырӷәӷәара.
Аконституциатә реформазы акомиссиа аԥҵаразы атәыла ахада Аслан Бжьаниа аусԥҟа инапы ацаиҩит жьҭаара 9 2020 шықәсазы.