АҞӘА, рашәара 8 — Sputnik. Аҟәатәи аҳаирбаӷәаза аусура ианалагалак ашьҭахь, иара иаднакылалоит урыстәылатәи ақалақьқәа быжьба рҟынтәи аҳаирпланқәа, абри атәы иҳәеит Аслан Бжьаниа, Петербургтәи Жәларбжьаратәи аекономикатә форум аҳәаақәа ирҭагӡаны РИА Новости аинтервиу анеиҭоз.
Бжьаниа иажәақәа рыла, аҳаирбаӷәаза аусура анхацыркхо ашықәсан аԥсшьаҩцәа рхыԥхьаӡара 50% рыла еиҳахоит ҳәа агәыӷра ыҟоуп.
Шәачатәи аҳаирбаӷәаза иаднакыло ауаа 11% – Аԥсныҟа ицо роуп иҳәеит Бжьаниа.
"Ҵыԥх шәачатәи аҳаирбаӷәаза иаднакылеит 12 млн ауаа, уи иаанагоит – миллионҩык апассаџьырцәа ҳара ҳтәқәа ракәхоит", – иҳәеит иара.
Аҟәатәи аҳаирбаӷәаза аиҭашьақәыргыларазы аиқәшаҳаҭра рыбжьарҵеит Аԥсны аиҳабыреи аилахәыра "Инфраструктурное Развитиеи" 2023 шықәса жьҭаара 27 рзы. Аргылара ахархәарахь ирыҭахоит 2024 шықәса ԥхынҷкәынмзазы.