АҞӘА, рашәара 25 - Sputnik. Аԥснытәи аҳәынҭқарратә университети Аҩада-Кавказтәи аҳәынҭакадемиеи арҵаратә программақәа рынагӡаразы аиқәшаҳаҭра рнапы аҵарҩит.
Аҳәынҭқарратә университет аҟны еиԥылеит аректор, академик Алеко Гәарамиеи АҩКАА аректор Руслан Кочкарови.
"Акыршықәса ҵуеит аԥсуа университети ҳареи аусеицура ҳабжьоижьҭеи. Сынтәа ҩ-дипломк рзы апрограмма анагӡара ҳгәы иҭоуп, уи ҳуниверситетқәа русеицураҿы даҽа шьаҿа бзиахоит", — иҳәеит Кочкаров.
Адокумент "Афымцамчхареи афымцатехникеи", "Афымцаеиқәыршәареи" рхырхарҭақәа рыла апрограмма анагӡара азгәанаҭоит.