АҞӘА, рашәара 25 - Sputnik. Аԥсны аспорт аҿиара иалацәажәеит аԥыза-министр Александр Анқәаби Аҿари аспорти русқәа рзы Аилак ахантәаҩы Ҭарашь Ҳагбеи, абри атәы аанацҳауеит Аҳәынҭспортеилакы.
Анқәаб БРИКС ахәмаррақәа рҟны аԥсуа спортсменцәа иаадырԥшыз алҵшәақәа идиныҳәалеит Ҳагба.
Ҳтәылаҟны аспорт ҿиаларц, ҳаспортсменцәа жәларбжьаратәи атурнирқәа ирылахәхаларц азы аҳәынҭқарра иалшо зегьы ҟанаҵалоит ҳәа азгәеиҭеит Анқәаб. Уи адагьы, Ахәмаррақәа рҟны аиааира згаз аспортсменцәеи аҿарацәеи реиԥылара еиҿкаатәуп иҳәеит иара.
БРИКС ахәмаррақәа рҿы Аԥсны еизгоу акоманда 90 тәыла рыбжьара 13-тәи аҭыԥ агеит амедальқәа рхыԥхьаӡарала. Зынӡа иаиааит 7 медальк, руак — ахьтәы, даҽакы — араӡын, хә-цырак — аџьаз медальқәа.