АҞӘА, ԥхынгәы 1 - Sputnik. Ареспубликатә биуџьет аҟынтәи 19,9 миллион мааҭ азоужьҭуп Дӷамшь аӡыршьҭра арыцқьареи Џьгьардеи Кәтоли аҟәарақәа рырӷәӷәареи рзы. Абри атәы аанацҳауеит ахада ипресс-маҵзура.
"Аԥсныҟәарахьчара" иамоу атехника зегьы ахархәара хымԥадатәны иҟалеит лаҵара 13 ауыха аҭыԥ змаз аӡхыҵра ӷәӷәа ашьҭахь, Дӷамшь аӡиас адамба ԥжәаны ауаа рыҩнқәа ианрыҵала, ацҳақәа аныхнах", – ҳәа иҳәеит Акапиталтә ргылара аусбарҭа атехникатә хылаԥшра анџьныр Михаил Кәыркәынаа.
Амҭакала акыр џьара аусурақәа мҩаԥысуеит. Уажәазы ацҳақәа рышьаҟақәа рыцқьоуп адамбақәа ҩба шьақәыргылоуп, аӡыршьҭра ырҭбааны ирыцқьоуп. Аусурақәа рхыркәшара азгәаҭоуп ԥхынгәымза анҵәамҭаз.
Лаҵара 13 ауыха Дӷамшь аӡиас хыҵит, ҭыԥқәак рҟны х-метрак рҟынӡа аҽышьҭнахит. Аӡы аҵлақәа ыҵнахит, ахатәыҩнқәа ирыҵалеит, Ӷәада ақыҭахь уназго амҩа ықәнаӡәӡәааит.