АҞӘА, ԥхынгәы 17 – Sputnik. Очамчыра, Тҟәарчал, Гал араионқәа рсоциал-економикатә ҿиара аҩаӡара аҳаракразы азакәан апроект иахәаԥшит аекономикатә политикеи ареформақәеи рзы Апарламенттә еилакы аилатәараҟны.
Адокумент иазԥхьагәанаҭоит арҭ араионқәа рҿы апартаментқәеи апарт-отельқәеи рыргылара.
Аекономикатә политикеи ареформақәеи рзы Апарламенттә еилакы аиҳабы Резо Занҭариа иажәақәа рыла, азакәан апроект иазԥхьагәанаҭоит 150 гектар рҟны апартаментқәеи апарт-отельқәеи рыргылара.
Апартаментқәа — инхарҭа ҭыԥӡам. Урҭ рҿы иааиԥмырҟьаӡакәа анхара азԥхьагәаҭаӡам.
Араионқәа рҟынтәи аргылараз азыҳәақәа ирыхәаԥшуеит Аминистрцәа реилазаара.
Аԥсны ахада Аслан Бжьаниа аекономикатә политикеи ареформақәеи рзы Апарламенттә еилакы аилатәара далахәын. Аԥсны аусура зылшо 140 000-ҩык ауаа ыҟоуп, официалла аус руеит 42 000-ҩык, 30 000-ҩык рхала аус руеит, 65 нызқьҩык аусурҭа ҭыԥ рымаӡам иҳәеит Бжьаниа.
"Очамчыра, Тҟәарчал, Гал араионқәа рсоциал-економикатә ҿиара аҩаӡара аҳаракразы ауснагӡатәқәа рзы" азакәан апроект изаамҭанытәиу Апарламент асессиаҟны иалацәажәоит.