АҞӘА, нанҳәа 4 - Sputnik. Аԥсны аҩнуҵҟатәи аусқәа рминистрра азиншәҟәқәа рыда атуристтә ҭыԥқәа рҟны еиуеиԥшым ауснагӡатәқәа рыдызгалоз 14-ҩык атәылауаа административтә ҭакԥхықәра рықәырҵеит. Абри атәы аанацҳауеит Аԥсны АҩАР апресс-маҵзура.
Нанҳәа 1-3 рзы аӡиа Риҵа амҩа аҟны имҩаԥгаз ареидқәа иаадырԥшыз аилагарақәа рыла административтә ԥкаанҵақәа еиқәыршәан.
Аԥсны аҩнуҵҟатәи аусқәа рминистрраҟны иазгәарҭеит арҭ аҭыԥқәеи ирыдыргало амаҵзурақәеи рзы ауаа ашшыԥхьыӡқәа шаанрыжьуаз.