АҞӘА, нанҳәа 7 - Sputnik. Аԥсны ахада Аслан Бжьаниа ихантәаҩрала Аҟәа имҩаԥысит Ашәарҭадаратә хеилак аилатәара ҳәа аанацҳауеит атәыла ахада ипресс-маҵзура.
Бжьаниа Аԥсны Ашәарҭадаратә хеилак амаӡаныҟәгаҩс иҟаз Сергеи Шамба иусура ҭабуп ҳәа ахҳәааны аколлектив дыдирдырит анапхгаҩ ҿыц Рауль Лолуа.
"Аусура шьақәыргылатәуп иҟалар зылшо амилаҭтә шәарҭадара ԥырхага амоуртә иаԥзырҟәҟәааша ауснагӡатәқәа азгәаҭарала", - ҳәа иҳәеит иара.
Лолуа иазгәеиҭеит, Аԥсны азы имариаз аамҭа шыҟамлац, жәларбжьаратәи апроцессқәа азгәаҭаны иахәҭаны иҟоу аусқәа шымҩаԥгалатәу.
"Ҳгәы иҭоуп ҳзинмчратә усбарҭақәеи ҳареи аусеицура, иҳалшо зегь ҟаҳҵоит ҳҳәынҭқарра ашәарҭадараз ҳусура алҵшәа аиурц" - ҳәа иҳәеит иара.
Ашәарҭадаратә хеилак алахәылацәа алацәажәеит Аԥсны аҩнуҵҟатәии адәныҟатәии аполитикатә зҵаарақәагьы.