АҞӘА, нанҳәа 9 - Sputnik. Аҟәатәи амаамынқәа рпитомник ахь ԥшь-хкык амаамынқәа ааргоит. Абри атәы Sputnik иазеиҭеиҳәеит Аԥсны Аҭҵаарадыррақәа ракадемиа аексперименталтә патологиеи атерапиеи рыҭҵаарадырратә институт аиҳабы Зураб Амқәаб.
Аԥышәкьаҿмаамын Вольфи аԥышәкьаҿмаамын Браззи, аҵыхәаҟаԥшь маамынқәеи акапуцин цәышәшәқәеи Аҟәатәи амаамынқәа рпитомник ахь иааргараны иҟоуп иҳәеит Амқәаб.
"Аҭыԥқәа рызҳархиахьеит. Ари амза иалагӡаны иааргараны иҟоуп. Дара хымчыбжь рыҩнуҵҟа акарантин иҟазаауеит. Анаҩс ирзырхиоу рыҭрақәа рахь инаргоит. Амаамынқәа акыр иԥшӡоуп", - иҳәоит иара.
Иахьа Аҟәатәи амаамынқәа рпитомник аҿы иҟоуп 500 рҟынӡа 11 маамын хкы.
Зегь раасҭа ирацәоу амакака-резуси апавиан-гамадрили роуп. Зеиуа хкы маҷу – мангабеи ҳәа изышьҭоу амаамын еиқәаҵәақәа роуп, урҭ ааигәа Аинститут ҩба аанахәеит.