АҞӘА, нанҳәа 12 - Sputnik. Аԥснынтәи 30-ҩык инреиҳаны урыстәылатәи АҩА рминистрреи АҶ-еи иртәу аҵараиурҭақәа ирҭалеит.
26-ҩык аԥсуа абитуриентцәа, урҭ рахьтә ԥшьҩык аҭыԥҳацәа ҭалеит Урыстәыла аҩнуҵҟатәи аусқәа рминистрра иатәу еиуеиԥшым аҵараиурҭақәа.
Аԥсны АҩАР аҟны акурсантцәа рҭоубашьҭаҵара мҩаԥысит.
Астудентцәа аҵара рҵалоит Краснодартәи ауниверситети, Волгоградтәии, Омсктәии, Нижегородтәии академиақәа рҟны. Аԥышәарақәа рнаҩсан дара ҩымчыбжь аруаҩ қәыԥш изы акурсқәа ирхысуан ҳәа аанацҳауеит аусбарҭа.
Урыстәыла АҶА аҵараиурҭақәа ирҭалаз фҩык акурсантцәа рҭоубашьҭаҵара мҩаԥысит Аҟәа. Мышқәак рышьҭахь дара Москваҟа, амцарцәаратә маҵзура Аҳәынҭқарратә Академиеи аграждантә хьчара Академиеи рахь аҵараҵаразы амҩа иқәлоит ҳәа аанацҳауеит аусбарҭа.
Аԥснытәи абитуриентцәа 2009 шықәса раахыс Урыстәыла АҶА рҵараиурҭақәа рҿы аҵара рҵоит. Рҵара хыркәшаны ареспубликахь ихынҳәуеит, дара АҶА аппарат хадеи араионтә ҟәшақәеи реилазаара хадырҭәаауеит.