АҞӘА, нанҳәа 17 - Sputnik. Хҩык аахақәа роуит Гагра араион аҟны иҟалаз амҩатә машәыр иахҟьаны.
Аԥсны Аҳәынҭавтоинспекциа аиҳабы ин.н. Дамеи Аҩӡба Sputnik ишазеиҭеиҳәаз ала, авариа ҟалеит ареспубликатә мҩаду аҟны нанҳәамза 16 рзы.
Аҩӡба иажәақәа рыла, Ԥсоу аганахьала зхы рханы ицоз ВАЗ 2110 арныҟәцаҩ, амҩатә ԥҟарақәа еилаганы, ицәаҳәа даныҵит. Уи ишьҭанеиуаз Toyota Mark X иақәтәаз арныҟәцаҩ аԥсҟы изнымкылеит, амашьынақәа ааихеит.
Аахақәа зауз ахәшәтәырҭахь инагоуп. Ҩыџьа ацхыраара анрырҭа ашьҭахь аҩныҟа иоушьҭын, ахԥатәи — игәчама ԥҵәоуп, ихшыбаҩ ааха амоуп, ахәшәтәырҭаҿы дышьҭоуп. Иԥсҭазаара ԥырхага амам.