Атуристтә дәыӷба "Риҵа" ашықәс иалагӡаны зны заҵәык ибжьысуеит Москва–Новороссиск–Гагра–Аҟәа–Шәача–Ростов–Москва ахырхарҭала жьҭаара 18 рзы. Ари амаршрут иаҵанакуа, насгьы иара ахьынӡахәарҭоу еилаҳкаарц ҳаӡбеит. Уи инаҷыданы Аԥсны аихамҩа аԥхын аамҭазы аусура шышьақәгылаз, аиԥҟьарақәа ыҟазма, аидарамҩангара аиҿкаашьа, абарҭқәа ртәы арадио Sputnik аефир аҟны еиҭеиҳәеит "Аԥсныеихамҩа" анџьныр хада Леонид Ҟәыруа.
Сынтәа аԥхын еиԥҟьарада аамҭеихша инақәыршәаны апассаџьырцәа дәыӷбала рымҩанагара алыршоуп уҳәартә иҟоуп ахырхарҭа Санкт-Петербург – Аҟәа, Москва – Аҟәа, убасгьы Тҟәаԥсынтәи Гагранӡа ибжьоу адәыӷба "Ласточка" ала ҳәа иҳәеит Ҟәыруа. Убасгьы адәыӷбала иаарго Аԥсныҟа аидара сынтәа аԥхын еиԥҟьарада иаартә еиԥш аҭагылазаашьа ыҟоуп иҳәеит "Аԥсныеихамҩа" анџьныр хада.
Ашықәсбжатәи арбагақәа ҵыԥхи сынтәеи еиҿҳарԥшуазар, ҵыԥх ахашәала 43 миллион мааҭ рҟынӡа ыҟазҭгьы, сынтәа 80 миллион мааҭ инацны иҟоуп апассаџьыртә мҩангарақәа ирыхҭныҵыз, аидарамҩангара акәзар - 115 миллион мааҭ рҟынтәи 141 миллион мааҭ рҟынӡа инеит ахашәала иҳәеит Ҟәыруа.
Аицәажәара шәаҳар шәылшоит аудиофаил аҟны хыхь.