АҞӘА, нанҳәа 19 – Sputnik. Кациқыҭ агәамсамеизакырҭа аргылара хыркәшоуп ҳәа "Аԥсны.Иахьа" иазеиҭеиҳәеит Аԥсны Акапиталтә ргылара аусбарҭа аиҳабы Ҭемыр Агрба.
Иара иажәақәа арыла, ашәҟәқәа зегьы анапы рыҵаҩуп аргылара ахархәарахь арыҭаразы, иара убас зхы иазырхәо Аҟәа ақалақь ахадарагьы налаҵаны.
"Атехника ҷыда ааҳхәоит, еилыху агәамсам хазы-хаз ашьҭаҵаразы ахыбра ашьақәыргылара иаҿуп", — ҳәа иҳәеит иара.
Агрба иҳәеит ареспубликатә мҩаду аҟынтәи агәамсамеизакырҭахь уназго амҩа ахәҭак шыҟаҵоу. Иара зегь шьақәыргылахоит 2025 шықәсазы.
Гәылрыԥшь араион Кациқыҭ аҟны икьакьоу абзазаратә црыҵқәа рзы агәамсамеизакырҭа аргылара иалагеит 2021 шықәса абҵарамзазы. Иара иаҵанакуеит 36 гектар, шықәсык аҩнуҵҟа 215 нызқь кәыбаметр ацрыҵ аус адулахоит. Иазгәаҭоуп Аҟәеи Гәылрыԥшь араиони рҟынтәи агәамсам уахь анагара.