АҞӘА, нанҳәа 20 – Sputnik. Асҭамыр Ҭаниа Гал араион Аҳәынҭавтоинспекциа аусбарҭа аиҳабыс дҟаҵоуп.
Аҩнуҵҟатәи аусқәа рминистрра Аҳәынҭавтоинспекциа аусбарҭа аиҳабы ин.н. Дамеи Аҩӡба иажәақәа рыла, акадртә еиҭакрақәа мҩаԥгоуп — амҩатә ԥҟарақәа еилазго раанкыларазы имҩаԥырго аусурақәа ахьырӷәӷәатәу азы.
"Иҳадыжәгалаз аҳасабырба арбагақәеи иҟоу аҭагылазаашьеи еиқәшәаӡом. Гал араион ААИА аусура ҽеим ҳәа иршьоит напхгара ҳазҭо, иара убас Аԥсны АҩАР анапхгарагьы", — иҳәеит иара.
Асҭамыр Ҭаниа ААИ асистемаҿы аус иуеит 2015 шықәса раахыс. 2023-2024 шш. — Аԥсны Аҩнуҵҟатәи аусқәа рминистрра Аҳәынҭавтоинспекциа аусбарҭа аиҳабы ихаҭыԥуаҩс дыҟан.