АҞӘА, нанҳәамза 27 - Sputnik. Аԥсни Аахыҵ Уаԥстәылеи рхьыԥшымра азхаҵара 16 шықәса ахыҵра инамаданы Приднестровие имҩаԥысит ареспубликақәа рхаҭарнакцәа рыдкылара. Абри атәы аанацҳауеит ахаҭарнакра аофициалтә саит.
Уахь ааԥхьара рыҭан Приднестровтәи адәныҟатәи аусқәа рминистрреи Бендери ақалақь жәлар рдепутатцәа Рхеилаки рхаҭарнакцәа, аҳәынҭқарратә усзуҩцәа.
Азинмчра нагӡа змоу Аԥсны ахаҭарнак Александр Ватаман иажәақәа рыла, Урыстәыла анаԥхгара ирыдыркылаз лахьынҵалатәи аӡбара ареспубликаҿы аҭынчреи аҭышәынтәалареи рыхьчараз ашьақәырӷәӷәара аиуит.
"2008 шықәсазы ари амш аҽны адунеи аҿы Аԥсуа ҳәынҭқарра ашьақәгылара шьақәырӷәӷәан, уи аҿиареи иахьа Аԥсны официалла аҳәынҭқаррабжьаратәи аизыҟазаашьақәа змоу егьырҭ атәылақәа рыла аринахысгьы азхаҵареи амч ду рыҭан", — иҳәеит иара.