Аԥсны

Сҭампыл аԥсуа сахьаҭыхыҩцәа рцәыргақәҵа мҩаԥысуеит

Sputnik
АҞӘА, цәыббра 1 – Sputnik. Сҭампыл аԥсуа сахьаҭыхыҩцәа рцәыргақәҵа мҩаԥысуеит цәыббра 5-19 рзы.
Асида Аҳәԥҳа, Адамыр Аршба, Аԥшьа Ҳагԥҳа, Асҭанда Чамагәуаԥҳа, Баҭал Џьапуа, Сабина Хынҭәԥҳа, Олег Ҷедиа, Саида Кәыҵниаԥҳа, Архип Лабахәуа русумҭақәа цәыргахоит Барын Хан агалереиа аҟны.
Аусмҩаԥгатә еиҿнакаауеит Аԥсны акультура аминистрра ацхыраарала агалереиа AUADA.
"Асахьаҭыхыҩцәеи Ҭырқәтәыла иҟоу аԥсуа-адыга диаспора рхаҭарнакцәа Д.Хәыжәи С.Ергиуни ажәалагала ҟарҵеит, ажьырныҳәа 21 рзы Аԥсуа милаҭтә сахьаркыратә галереиа абылра иазкны аԥсуа сахьаҭыхыҩцәа рцәыргақәҵа Сҭампыл амҩаԥгаразы", — лҳәеит асахьаҭыхҩы Диана Хынҭәԥҳа.
Ацәыргақәҵаҿ асахьаҭыхымҭақәа рнаҩсгьы иҟалоит, аинсталлиациақәа, амҿлыхқәа, аколлажқәа, напыла иҟаҵоу акьанџьақәа.
Аԥсны Асахьаҭыхыҩцәа реидгыла ахыбра амца акит ажьырныҳәамза 21 ауха. Ԥшьнызқь сахьаҭыхымҭа рҟынтәи 150 рҟынӡа еиқәхеит, урҭ рхыԥхьаӡараҿ иҟоуп Варвара Бубнова лусумҭақәа ҩба.