Араса, аџьықәреи сынтәа анхацәа раарыхра зеиԥшроу, иззыԥшу аҽаҩра ҟалама, араса аарыхреи аҭиреи ҳаамҭазы иацу ауадаҩрақәа зеиԥшроу, акьылазы ахәԥса шԥаҟоу, аҳазалхратә шәахтәқәас иақәу атәы арадио Sputnik аефир аҟны дазааҭгылеит Ақыҭанхамҩа аминистр Беслан Џьопуа.
Аҵыхәтәантәи хышықәса араса аҽаҩра 10 инаркны 12 нызқь тонна рҟынӡа аадрыхуеит анхацәа, сынтәагьы уиаҟара акәхоит, иҳәеит Џьопуа. Аԥсны 9 нызқь гектар иахьаҵанакуа араса аадрыхуеит, 6-миллион шьаҭа рҟынӡа ыҟоуп, еиҳараӡак Гал араион аҟны - ԥшь-миллион шьаҭа, иҳәеит ақыҭанхамҩа аминистр.
Араса аџьабаа адызбалаз, изыхәштәыз рҽаҩра цәгьаӡам, ахаҭабзиарагьы бзиоуп, ҳәа азгәеиҭеит Џьопуа. 2021 иреиӷьыз шықәсан араса аҽаҩразы, усҟан 13-14 нызқь тонна аадрыхит, егьырҭ ашықәсқәа рзы 9 нызқь тонна иреиҵамкәа иаадрыхуеит анхацәа, сынтәа ианеиҵоу араса ахә 100 мааҭк иаԥсоуп, иҳәеит аминистр.
Аџьықәреи акәзар, сынтәа 9 нызқь гектар рҟынӡа лаҵоуп, 15 нызқь тонна рҟынӡа аҽаҩра иазыԥшуп анхацәа, иҳәеит Џьопуа.
Аицәажәара инеиҵыхны ишәаҳар шәылшоит аудиофаил аҟны хыхь.