АҞӘА, цәыббра 3 - Sputnik. Столыпин ихьӡ зху ақыҭанхамҩатә гимназиа аԥснытәи ахәыҷқәа рыдкылара иазыхиоуп.
Аԥснытәи ахәыҷқәа рзы аҵараиурҭаҿы иҟоу алшарақәа ирылацәажәеит Аԥсны атуризм аминистр Ҭеимураз Хышбеи апроект "Вятский Посад" анапхгаҩы Геннади Цуркови, абри атәы аанацҳауеит аусбарҭа апресс-маҵзура.
Агимназиа аадыртит цәыббра 2 2024 шықәсазы Орловтәи аобласт аҿы. Иара адоуҳа-иашахаҵаратә центр "Вятский посад" асистема иаҵанакуа ақыҭанхамҩатә комплекс "Орловский колос" иахәҭакуп.
Аусбарҭа иазнархиоит агрономцәа, азоотехникцәа, аветеринарцәа, амотористцәа уҳәа ақыҭанхамҩа иадҳәалоу егьырҭ азанааҭқәа рхаҭарнакцәагьы. Ахыбра 550-ҩык рҟынӡа аҵаҩцәа аднакылар алшоит.