АҞӘА, цәыббра 4– Sputnik. Санкт-Петербургтәи атеатр "Балтикатәи аҩны" Аҟәа аспектакльқәа ԥшьба днарбоит РУСДРАМ асценаҿ ҳәа арадио Sputnik иазеиҭеиҳәеит атеатр адиректор Сергеи Шуб.
"Акырҵуеит шәтеатри ҳареи ҳаиҩызцәоижьҭеи. Ҳаиҩызцәоуп атеатр анапхгаҩи (Иракли Хынҭәба – азгә.) ҳареи. Атеатр изныкымкәа Петербург агастрольқәа мҩаԥнагахьеит, ҳфестивальқәа ирылахәхахьеит. Уажәы ҳара ҳашәҭааит", - иҳәоит иара.
Шуб иажәақәа рыла, Аҟәа иддырбарц ирҭахыз аспектакльқәа ралхраан атеатр анапхгара иалкаау ашәагазагақәа ирықәныҟәон. Раԥхьа иргыланы ақәыргыламҭа асахьаркыратә ҩаӡара иазхьаԥшуан. Иазхьаԥшуан издызкыло атеатр арепертуар, асцена амҽхак, аԥсуа хәаԥшыҩцәа рҭахрақәа.
"Балтикатәи аҩны" ԥшь- спектакльк аанагоит –Чехов иклассика, ҳаамҭазтәи урыстәылатәии аҳәаанырцәтәии пиесақәа, ахәыҷтәы лакә. Атеатр атруппеи атехникатә персонали бжьаратәла 40 –ҩык ыҟоуп.
Сергеи Шуб иажәақәа рыла ртеатр арежиссиор ԥхьаҟа РУСДРАМ аҿы аспектакль ықәиргылар алшоит. Макьаназ ари аидеиа иалацәажәоит ауп, аха аԥснытәи атеатр аус ацура абри ахырхарҭа алагьы ирҿиахалоит.
Цәыббра 13 - 15 рзы РУСДРАМ аҿы идырбахоит ԥшь-спектакльк: "Ацыхцых" - Чехов, "Таниа" - Алексеи Арбузов, алакә "Му ани иара аҩызцәеи рыхҭысқәа", "Излацәажәозеи ахацәеи аҳәсеи" - Исмин Реза. Ауснагӡатә еиҿкаауп Росконцерт апрограмма "Агастроль дуқәа" аҳәаа иҭагӡаны.