АҞӘА, цәыббра 13 – Sputnik. Аԥсны Арбџьармчқәа рыдҵаҟаҵаҩ, атәыла ахада Аслан Бжьаниа ихантәаҩрала Аҟәа имҩаԥысит Атәылахьчара аминистрреи Аштаб хадеи рнапхгара реилатәара. Абри атәы аанацҳауеит "Аԥсныпресс" амаҵзура.
Аԥсны ахада изеиҭарҳәеит адунеи аҿы иҟоу арра-политикатә ҭагылазаашьа, жәларбжьаратәи арратә усеицура атәы, 2020-2024шш. рызтәи Аԥсны Арбџьармчқәа рырра-техникатә еиқәыршәара шымҩаԥгоу.
Атәылахьчара аминистр Владимир Ануа 2024 шықәса аамзтәи аусбарҭа аусура аихшьаала ҟаиҵеит.
Ануа иажәақәа рыла, 2024 шықәсазы арратә напхгаратә усбарҭақәеи аруааи разыҟаҵара хынтәны еиҳахеит. Еицымҩаԥгаз аштабтә ҽазыҟаҵарақәа ирылахәын Аԥсны АШәМ, АҩАР, АҶА, АҲЕ, араионқәа рхадарақәа русзуҩцәа. Аҽазыҟаҵарақәа рыцымҩаԥган еидҵоу урыстәылатәи абыжьбатәи арратә база.
Уи адагьы азхьаԥшра ду рымоуп Арбџьармчқәа ррезерв, иаларгалоит аррамаҵзура иахысуа ахырхарҭа ҿыцқәа рыла аҵара дырҵара.