АҞӘА, цәыббра 17 — Sputnik, Бадрак Аҩӡба. Аԥсни Урыстәылеи аҩнуҵҟатәи аусқәа рминистррақәа еицырзеиԥшу аинформациа-координациатә Центр ахыбра лашарала аиқәыршәаразы аусурақәа мҩаԥысуеит.
Аҟәатәи афымцаҳақәа рынџьныр хада Алексеи Строчан иажәақәа рыла, аҳҭнықалақь ауааԥсыреи асасцәеи ауадаҩрақәа ирықәымшәарц азы аусурақәа ирылагеит асезон анҵәамҭаз.
Аусурақәа мҩаԥысуеит Аиааира апроспекти Ажәанбеи Арӡынбеи рымҩақәеи рҟны. Ишьҭаҵахоит 10 кВт зымчхара ыҟоу афымцатә кабель. Аамҭакала идырҽеиуеит уажәазы аус зуа аҳақәагьы", ҳәа азгәеиҭеит Строчан.
Леон имҩеи Арӡынба имҩеи реихысырҭаҿы 1947 шықәсазы ишьҭарҵаз акабель хымԥада аиҭашьақәыргылара аҭахны иҟан.
Мчыбжьык аҩнуҵҟа ихыркәшахаран иҟоу аусурақәа, аиҳабырабжьаратә еиқәшаҳаҭра инақәыршәаны урыстәылатәи аган ари аус иазоурышьҭит 19 миллион мааҭ.