АҞӘА, цәыббра 18 — Sputnik. Закәаншьаҭада 30 200 сигарет Аԥсны аҳәаа ишахыргоз урыстәылатәи аҳазалхыҩцәа иааныркылеит, абри атәы аанацҳауеит Аладатәи аҳазалхратә усбарҭа.
Аалыҵ аиагара рҽазыршәеит автомашьына BMW X5 ала. Агьежьхарԥақәа рҟны аҭаҵәахҭыԥ еиҿкааны аҭаҭын ҭоԥқәа ҭаҵаны иҟаҵан.
Азинеилагаҩцәа рҿазыршәеит 1510 ҭоԥ акцизтә дыргақәа зқәымыз аҭаҭын аиагара. Асигаретқәа Дубаи иҭыжьуп, урҭ рзеиԥшхәԥса 200 000 мааҭ артәоит.
Аҭаҭын аалыҵи автомашьынеи изтәу имхуп, ашьаус хацыркуп. Ахьархәразы иҟалоит 300 000 мааҭ инаркны миллионк аҟынӡа ахараԥса, ма хәышықәса рҟынӡа ахақәиҭра алхәыдатәра иқәҵахар.
Ашықәс иалагазар закәаншьаҭада Аԥснынтәи аҭаҭынаалыҵ аиагаразы 700 ус хацыркуп административтә закәанеилагаразы, ашьаусқәа 7. Ирымхуп 1,2 миллион сигарет, 45 кьыла анасваи.