АҞӘА, цәыббра 19 — Sputnik. Аԥснытәи ашәаҳәаҩ Леван Ԥхалаӡе аканал "Россия-1" аҟны имҩаԥысуа ашәаҳәаратә шоу "Ну-ка, все вместе!" далахәхоит.
"Хәышықәса акастингқәа онлаин имҩаԥысуан, сынтәа, Урыстәыла ақалақьқәа Шәача, Екатеринбург, Нижни Новгород, Уфа, Москва рҿы имҩаԥган. Ҳәарада, москватәи акастинг зегь раасҭа иуадаҩын, избанзар арахь иааит ҩ-нызқьҩык рҟынӡа", — иҳәеит Москватәи аҳәынҭқарратә акультура аинститут аестрада-џьазтә ҟазара акафедра астудент.
Ԥхалаӡе адгылара ирҭеит ажиури алахәылацәа рыжәаҩык. Амузыкант иажәақәа рыла, акастинг ашьҭахь ишьақәырӷәӷәан арепертуар. Иара инаишьҭыз 60 ашәа рҟынтәи акы алхын.
Ԥхалаӡе амузыкатә проект "Ну-ка, все вместе!" аҟны дықәгылоит цәыббра 20 асааҭ 21:30 рзы, аканал "Россия-1" аҟны.