АҞӘА, цәыббра 20 — Sputnik. Аиустициа аминистр Анри Барцыц зхадараҿы дыҟоу аԥснытәи аделегациа Аахыҵ Уаԥстәылаҟа инеит, ареспублика 34 шықәса ахыҵра аламҭалаз.
Sputnik Аахыҵ Уаԥстәыла ишаанацҳауа ала, ареспублика ахада Алан Гаглоев иԥылараан Барцыц иазгәеиҭеит Аԥсни Аахыҵ Уаԥстәылеи адунеи аҿы аполитикатә иашамра раԥхьа иаҿагылаз дара шракәу, убри аан аиааира агарагьы шрылшаз.
"Сақәгәыӷуеит ииашоу адунеитә еиҿкаара аԥыжәара агап ҳәа, ҳара зегьы Урыстәыла ҳацны ԥхьаҟа ацара ҳалшап ҳәа", — иҳәеит Барцыц.
Аахыҵ Уаԥстәыла ахада инаҵшьны иазгәеиҭеит аиашьаратә республикақәа уаҵәтәи рԥеиԥш иахьа уажәраанӡа ацхыраара рызҭо Урыстәылатәи Афедерациа ишадырҳәало.