АҞӘА, цәыббра 21 — Sputnik. Аҟәа иаатит Аԥсни Урыстәылеи рфырхаҵа Витали Вольф ихьӡ зху акарате азы аицлабра "Агәалашәаратә храҿа", абри атәы аанацҳауеит Аԥсны Аҳәынҭспортеилакы.
Уи иалахәуп Аԥсни Башкортосҭани рҟынтәи 140-ҩык ахәыҷқәа.
Аусмҩаԥгатә аартраҿы иалахәыз ирзаԥхьеит Витали иҭаацәа Александри Лиудмилеи Вольфаа рҟынтәи ашәҟәы.
"Шәара шәалахәхарала имҩаԥысуа аицлабра Аԥсни Урыстәылеи рыжәларқәа реиҩызара арӷәӷәара иацхраауеит, еиҵагыло абиԥара арра-патриоттә ааӡара аус аҿы алагала дууп ҳәа агәра ганы ҳаҟоуп", — ҳәа аҳәоит атекст аҿы.
Нанҳәамза 1992 шықәса инаркны Витали Вольф ақырҭуа-аԥсуа еимакы аҭышәнартәалараз абжьаҟазаратә мчқәа 345-тәи аполк далан.
Иԥсҭазаара далҵит 1993 шықәсазы хәажәкыра 27 рзы Алада Ешыра. 2013 ашықәсазы Аԥсны Афырхаҵа ҳәа ахьӡ ҳаракы ихҵан.