АҞӘА, цәыббра 23 — Sputnik. РУСДРАМ аспектакль "Ахьча Махаз" дырбахоит Ростов-Донтәи имҩаԥысуа VIII Жәларбжьаратәи атеатртә фестиваль "Русская комедия" аҳәаақәа ирҭагӡаны.
Ақәыргыламҭа ддырбоит жьҭаара 12 рзы Максим Горьки ихьӡ зху Ростовтәи адрама академиатә театр асценаҿы аицлабратә программа аҳәаақәа ирҭагӡаны.
Афестиваль "Русская комедия" – акомедиатә жанр иаҵанакуа иреиӷьу аспектакльқәа ахьыддырбо, аурыс классикатә драматә рҿиамҭақәеи ҳаамҭазтәи авторцәа рырҿиамаҭқәеи рықәыргылараҟны иҿыцу атеатртә формақәеи ақәыргыларатә идеиақәеи ахьырыԥшаауа, актиорцәа, арежиссиорцәа, асахьаҭыхыҩцәа рҟазаратә еиндаҭлароуп.
Афестиваль еиҿкаауп Урыстәыла акультура аминистрреи Ростовтәи аобласт Аиҳабыреи рыдгыларала.