АҞӘА, жьҭаара 4 - Sputnik. Гал араион аҿы аӡеизакырҭақәа еиҭашьақәдыргылеит. Абри атәы арадио Sputnik аефир аҿы иҳәеит араион ахада Константин Ԥлиа.
Ԥлиа иажәақәа рыла, Речхә ақыҭантәи аӡҭагаларҭа аҟынтәи аӡы ахала иаауеит. Уажәы аӡкылҵәарақәа еиҭашьақәдыргылоит, урҭ ирыбзоураны Гал аарҩарақәа раангьы ӡыржәтәла аиқәыршәара алыршахоит.
Асанитар-епидемиологиатә станциа аӡы ахаҭабзиара гәарҭеит. Ԥлиа ишазгәеиҭаз ала арбагақәа бзиоуп.
"Иааиуа ашықәсаз аарҩарақәа ҟаларгьы, уажәшьҭа ақалақь ӡыда иаанхаӡом, аха иҟоуп аҽа уадаҩрак. Ақалақь аӡымҩангагатә цәаҳәақәа еиҭашьақәыргылатәуп – амҩангагақәа рҿы аӡы ахьацәцо рацәоуп, зегьы ԥсахтәуп", - ҳәа иҳәеит иара.
Араион анапхгара ирыгәҭакуп, аӡымҩангагақәа рыԥсахра аус аԥара азырыԥшаарц ареспублика анапхгара рахь аҳәара ҟарҵарц.