АҞӘА, жьҭаара 4 - Sputnik. Москва имҩаԥысит Аԥсни, Урыстәылеи, Аахыҵ Уаԥстәылеи рыдәныҟатәи аусқәа рминистрцәа х-ганктәи реиԥылара. Абри атәы аанацҳауеит Урыстәыла Адәныҟатәи аусқәа рминистрра асаит.
Сергеи Лавров инаҵшьны иазгәеиҭеит Москва аринахысгьы Аҟәеи Цхинвали ршәарҭадара ашьақәыргылареи, жәларбжьаратәи аизыҟазаашьақәа рырҭбаареи, аекономикатә ҿиареи рзы иалшо ала ацхыраара шыҟанаҵо.
"Инаҵшьны иазгәаҭоуп 2008 шықәсазы Урыстәыла анапхгара Аԥсны Аҳәынҭқарреи Аахыҵ Уаԥстәылатәи Аҳәынҭқарреи рызхаҵаразы ирыдыркылаз аӡбамҭа аиҭахәаԥшра шалымшо", — ҳәа аҳәоит акьыԥхьымҭаҿы.
Аганқәа иара убасгьы ирылацәажәеит Владимир Путин Украина аҭагылазаашьа аҭышәнартәалареи жәларбжьаратәи аизыҟазаашьақәа рсистема аиҭакрази иҟаиҵаз аԥшьгарақәа, иара убас Урыстәыла БРИКС ахантәаҩыс аҟазаара азҵаарақәа.