АҞӘА, жьҭаара 4 - Sputnik. Аԥсни Урыстәылеи рыдәныҟаполитикатә усбарҭақәа рминистрцәа Сергеи Шамбеи Сергеи Лаврови реиԥылара мҩаԥысит Москва ахәаша, жьҭаара ԥшьба рзы.
Урыстәыла Адәныҟатәи аусқәа рминистрра анаԥхгаҩы Шамба аԥсшәа иаҳәо иазгәеиҭеит, Москва аринахысгьы Аԥсны асоциал-економикатә ҿиараҿы ацхыраара шыҟанаҵо, атәылақәа рыбжьара аицәажәара шҭышәынтәалоу, еиуеиԥшым аҩаӡарақәа рҿы аусеицура шмҩаԥысуа, иара убасгьы иҳәеит апандемиаанӡатәи аамҭақәа раахыс ахәаахәҭра амҽхак ҩынтәны ишеизҳаз.
Аиԥылараҿы ареспублика ашәарҭадареи жәларбжьаратәи азхаҵареи рызҵаарақәа шьҭыхын. Сергеи Лавров иазгәеиҭеит Аахыҵ Кавказ ашәарҭадареи аҭышәынтәалареи рзы Женеватәи аилацәажәарақәа рҿы Москва апозициа апринциптә ҟазшьа шамоу.
Лавров иҳәеит, аоперациа ҷыда аан Аԥсны Урыстәыла адгылара шанаҭо – аԥснытәи ахатәгәаԥхаҩцәа Донбасс ицо аиҿагыларақәа ишрылахәу, ареспублика атәылауаа агуманитартә цхыраара шыҟарҵо, мчыла зыҩнқәа рааныжьра зықәшәаз урыстәылауаа шрыдыркыло, Курсктәи аобласт аҟынтәи ахәыҷқәагьы алагер "Афырхацәа рхылҵшьҭрақәа" аҟны ишрыдыркылаз.
Сергеи Шамба иганахь ала иҳәеит, аресбулика ҵабыргла, ламысла аиҩызаратә хыдҵақәа шынанагӡо.
Иара иажәақәа рыла, аԥсуа жәлар рхыԥхьаӡара ахьмаҷу иахҟьаны, аполитикатә маанақәа ишрызхьамԥшуа, Сергеи Лавров иеиԥш иҟоу аԥышәа ду змоу адипломат аус ицура ареспублика иуадаҩу адунеи аҿы ииашоу адырра амазаара иацхраауеит ҳәа агәыӷра шимоу.
Аԥсны адәныҟаполитикатә усбарҭа аиҳабы иҳәеит Урыстәылеи Аԥсни рзакәанԥҵарақәа реишьаршәаларазы 45 уснагӡатә рҟынтәи 27 уснагӡатә шынагӡоу.
"Ҳара ҳадәныҟаполитикатә ҭагылазаашьа мариам, ҳгәаанагарақәа еиҿагылоит, аха, аҵыхәтәан, ҳара зегьы ҳҳәынҭқарра аинтересқәа роуп ихадараны иаҳшьо". - ҳәа азгәеиҭеит иара.
Сергеи Шамба 2024 шықәсазы Адәныҟатәи аусқәа рминистрс даныҟарҵа ашьҭахь, ари Урыстәылаҟа раԥхьатәи иусуратә ныҟәароуп. Лаврови иареи ҩганктәи реиԥылара адагьы, иахьа Аԥсны-Урыстәыла-Аахыҵ Уаԥстәыла аформат ала х-ганктәи аиԥылара азгәаҭоуп.