АҞӘА, жьҭаара 16 – Sputnik, Бадраҟ Аҩӡба. В.Тхапсаев ихьӡ зху Нхыҵ Уаԥстәылатәи аҳәынҭқарратә академиатә театр аԥсуа хәаԥшцәа ҩ-спектакльк ддырбараны иҟоуп – "Аҳәынҭқар Лир", "Ацәымҵ" ҳәа иҳәеит атеатр асахьаркыратә напхгаҩы Гиви Валиев Sputnik апресс-центр аҿы.
"Ҳара иааҳгеит иреиӷьу ҳаспектакльқәа — "Аҳәынҭқар Лир" ари "Ахьтәы сабрада" аноминациақәа ԥшьба рҿы — "иреиӷьу аԥҳәыс лроль", "иреиӷьу ахаҵа ироль", "иреиӷьу аспектакль", "иреиӷьу арежиссура" рҟны иалкаахаз спектакльуп". Сара "иреиӷьу ахаҵа ироль" аноминациа аҟны "Ахьтәы сабрада" соуит", - ҳәа иҳәеит иара.
Иара иқәыргыламҭала "Аҳәынҭқар Лир" иҳаҩсыз ашәышықәса 90-тәи ашықәсқәа рзы, атәыла ду анеилабгоз аамҭахь "ииасит". Иара аспектакль амаӡақәа ааимыртит, ахәаԥшцәа аспектакль иаҭаарц, зегьы рыблала ирбарц ааԥхьара риҭеит.
Агастрольқәа аҩбатәи рымш аҽны Нхыҵ Уаԥстәылатәи атеатр аҿы Етель Воинич лроман ашьаҭала иқәыргылоу аспектакль "Ацәымҵ" цәыргахоит.
"Ҳара ҳқәыԥшра аамҭазы зегь реиҳа иромантикатәны иаҳбоз арҿиамҭа ҳахәмаруеит. Сара исыздыруам, ароман "Ацәымҵ" иамыԥхьац 80-тәи ашықәсқәа раантәи ауаа ыҟоуп ҳәа. Аспектакль Вахтангов ихьӡ зху атеатр аҿы аус зуа арежиссиор Ельдар Трамов иқәиргылеит", - ҳәа иҳәеит Гиви Валиев.
Аԥсны акультура аминистрра акультуреи аҟазареи рыҟәша аҟазауаҩ хада Адамыр Гәынба, атеатралтә ҟазареи акультура егьырҭ ахырхарҭақәеи рҿы Нхыҵ Уаԥстәылеи ҳареи ҳаизыҟазаашьақәа рыҿиара аҵак ду шамоу азгәеиҭеит.