АҞӘА, жьҭаара 23 - Sputnik. Урыстәылатәи Афедерациа ахада Владимир Путин БРИКС иалахәу асуверентә тәылақәа еицхәыцуа тәылақәоуп ҳәа рзиҳәеит. Абри атәы кьыԥхьуп РИА Новости асаит аҟны.
"Иуҳәар иашахоит БРИКС иаҵанакуа, еиуеиԥшым аконтинентқәа, аҿиаратә модельқәа, адинқәа, ацивилизациақәа, акультурақәа хаҭарнакра рзызуа асуверентә тәылақәа еиԥшны ихәыцуа роуп ҳәа", - иҳәеит Путин БРИКС асаммит аилатәара маҷ аҿы.
Урыстәыла ахада иазгәеиҭеит БРИКС иалахәу атәылақәа зегьы аиҟарареи, агәылеимабзиареи, аҳаҭыреиқәҵареи, аиҩызареи, аҳәоуеиқәшәареи рзы аидеал ҳаракқәа рышьақәыргылареи, реизҳазыӷьареи ишрыдгыло.
"Урҭ ажәала акәымкәа, усла адунеи ԥхьаҟатәи аԥеиԥш азы аҭакԥхықәра аадырԥшуеит, ииашаҵәҟьаны адунеизегьтәи аҭышәынтәалареи ашәарҭадареи рганахьала аҭагылазаашьа хра аманы анырра арҭоит, иҵару арегионалтә проблемақәа рыӡбараҿы алагала ду ҟарҵоит", - ҳәа иҳәеит Урыстәыла ахада.