АҞӘА, жьҭаара 24 – Sputnik. "Аҟәа-марафон" амҩаԥгараан аҳҭнықалақь амҩадуқәа рыхәҭак, мамзаргьы ишеизаку иаркхоит ҳәа аанацҳауеит Аԥсны Аҩнуҵҟатәи аусқәа рминистрра.
Аԥкрақәа алагалазаауеит жьҭаара 27 асааҭ 07:00 инаркны асааҭ 16:00 рҟынӡа.
Амҩақәа зегьы рҿы атроллеибусқәа рныҟәара аанкылахоит.
Амҩа зынӡа иаркхоит Аиааира апроспекти Имам Шамил имҩадуи Аиааира апроспекти реихысырҭа инаркны Лакәаба имҩаҟынӡа иҟоу ахәҭа зегьы.
Ҳәҭа-хәҭала иаркхоит: Адлеиба имҩала "Ауарашзауад" аангыларҭа инаркны Агәмаа имҩа аҟынӡа, еиҿкаахоит ареверсивтә ныҟәара.
Амҩа азбжак аҟны ареверсивтә ныҟәара ҟалоит Кәыдрытәи амҩала 14-тәи ашкол инаркны Кьалашәыртәи ацҳаҟынӡа.
Лакәаба имҩа асасааирҭа "ИнтерСухум" инаркны Ацҳа ҟаԥшь аҟынӡа аныҟәара ҟалоит амҩа арымарахьтәи аацәаҳәа ала, Ақырҭаа имҩала Ацҳа ҟаԥшь инаркны 14-тәи ашкол аҟынӡа–атроллеибус цәаҳәа.
Коӷониа имҩаҿи иара иаԥну акварталқәеи рҿы инхо ауаа рзы Џьонуеи Аршбеи рымҩақәа рҿы аныҟәара алыршахоит.