АҞӘА, жьҭаара 23 - Sputnik. Аботаникатә институт аконференциатә зал аҿы иаатит Аԥсны аҵарауаа ҿарацәа аҩбатәи рфорум.
Аҵарауаа ҿарацәеи аспирантцәеи агуманитартә, асоциалтә, ауаажәларратә, афизика-математикатә, амедицина-биологиатә ҭҵаарадыррақәа рганахь ала русумҭақәа цәырыргоит.
"Ҳара имҩаԥааго абжьааԥанытәи аҭҵаарадырратә конференциаӡам, ҳара Аԥсны аҭҵаарадырра аҿиара аҭоурых аҟны адаҟьа ҿыц ааҳартуеит. 2022 шықәсазы ҳара имҩаԥаагеит Аԥсны академиа 25 шықәса ахыҵра иазкыз Аԥсны аҵарауаа ҿарацәа актәи рфорум" - ҳәа иҳәеит Аԥсны аҭҵаарадыррақәа ракадемиа аиҳабы Зураб Џьапуа.
Иара иажәақәа рыла, аҭҵаарадырратә форум ҩышықәса рахь знык имҩаԥгахалоит, аусумҭақәа хазы еидкылан иҭыжьлахоит. Џьапуа агәыӷра ааирԥшит 2026 шықәса инаркны афорум жәларбжьаратәи аҟазшьа аиуп, Урыстәылатәи аҵарауаагьы уи рхы аладырхәып ҳәа.
Афорум мҩаԥысуеит жьҭаара 25 рҟынӡа. Еиҿнакааит – Аԥсны аҭҵаарадыррақәа ракадемиа.