Аԥсны Аҭҵаарадыррақәа ракадемиа имҩаԥнагаз аҵарауаа ҿарацәа Аҩбатәи рфорум хыркәшан жьҭаарамза 25 рзы.
Арадио Sputnik аҟны афорум азы иазырхиаз ажәахәқәа зызкызи, аҭҵаарадырратә усзуҩцәа рзы ас еиԥш ауснагӡатә амҩаԥгара зхымԥадатәуи рзы ргәаанагара рҳәеит Аԥышәаратә патологиеи атерапиеи ринститут, аиммунологиеи авирусологиеи рлабораториа аҭҵаарадырратә усзуҩ еиҵбы Фаина Горухчиевеи Аекономикеи азини ринститут аҭҵаарадырратә усзуҩ Давид Арӡынбеи.
Афорум рхы аладырхәит 40-ҩык аҵарауаа ҿарацәеи аспирантцәеи, дара ҩымш рыла иӡырыргеит агуманитартә, асоциалтә, ауаажәларратә, афизико-математикатә, абиомедицинатә ҭҵаарадыррақәа ирызкны аусумҭақәа. Аҭҵаарадырратә форум ҩышықәса рахь знык имҩаԥысуеит. 2026 шықәса инаркны ижәларбжьаратәны аҟаҵара азгәаҭоуп.
Инарҭбааны аиҿцәажәара шәахәаԥшыр шәылшоит авидеонҵамҭаҿы.