АҞӘА, жьҭаара 28 - Sputnik. Уфа аӡиас Белаиа аԥшаҳәаҿы игылоу агәашьаркыра иреиӷьу асахьа азы афотоконкурс рылаҳәоуп.
Афотоеицлабра иалахәхар рылшоит 16 шықәса инаркны изхыҵуа агәаҳәара змоу зегьы, дара х-усумҭак нарышьҭыр ҟалоит аноминациақәа "Азанааҭтә фотоҭыхра", "Абзиабаҩцәа рфотоҭыхра" рахь.
Арзаҳалқәа рыдыркылалоит абҵарамза 8 рҟынӡа, аихшьаалақәа ҟаҵахоит абҵарамза 25 рзы.
Аҟәа аԥшаҳәаҿы игылоу агәашьаркыра аиԥш зеиԥшу Уфа иаартын жьҭаарамза 10 рзы, Башкорҭосҭани Аԥсни реиҩызара аҳаҭыраз. Раԥхьатәи ахаҳә шьҭаҵан 2023 шықәса жьҭаарамзазы Аԥсны ахада Аслан Бжьаниа усутә ныҟәарыла уа даныҟаз.