АҞӘА, жьҭаара 29 - Sputnik. XVIII Ареспубликатә арра-спорттә еицлабрақәа "Аиааира" аатит Аԥсны атәылахьчара артиллериатә гәыԥ аҟны.
Уи иалахәуп жәаҩык-жәаҩык 9,10,11 аклассқәа рҵаҩцәа рыла ишьақәгылоу аа-командак.
"Раԥхьа араионқәеи аҳҭнықьалақьи рҟны имҩаԥган аицлабрақәа, уаҟа зҽалызкааз ахәыҷқәа рыла агәыԥқәа еиқәыршәаны Ареспубликатә еицлабраахь инашьҭын. Сынтәа 18 шықәса ҵуеит, арҭ ашықәсқәа ирылагӡаны аицлабрақәа ахатәы традициақәеи аԥҟарақәеи аиуит", — иҳәеит аицлабра аӡбаҩ хада Беслан Мышәба.
Хәымш ирылагӡаны акомандақәа еицлабуеит 12 спортхкы рыла: аишьҭагыланыҟәара, ашаха ахара, еиуеиԥшым абжьаӡарақәа рҿы аҩра, автоматқәа реимыхреи реибыҭареи, ахысра, аграната аршәра уҳәа.
Сынтәа ҿыц иалагалоуп ахыци ахәымпали рыла ахысра, атопографиеи аҭыԥқәеи рхырхарҭақәа реилкаара.
Ареспубликатә арра-спорттә еицлабрақәа "Аиааира" аиҿкааҩцәа — Аԥсны Аҵара аминистрра, Атәылахьчара аминистрра.