АҞӘА, жьҭаара 29 - Sputnik. Аԥснытәи аконкурсантцәа Москва имҩаԥысуаз аинвалидцәеи зышарақәа ԥкуи рыбжьара азанааҭтә ҟазаразы Амилаҭтә чемпионат "Абилимпикс" аҿы аԥхьахәтә ҭыԥқәа ааныркылеит.
Милана Аџьԥҳа арҿиаратә индустриақәа рхырхарҭала “Апатреҭҭыхра” адырраҿы аҩбатәи аҭыԥ аанылкылеит,
Дамир Арсҭаа — "Аргылара" ахырхарҭала "Афымцеибыҭара" адырраҿы ахԥатәи аҭыԥ даԥсахеит,
Адриан Озган — "IT - атехнологиақәа" рхырхарҭала "Аробототехника" адырраҿы ахԥатәи аҭыԥ игеит,
Валериа Џьынџьалԥҳа "Адекоратив-хархәаратә ҟазара" ахырхарҭала "Афлористика" аадырраҿы "аиааира агәазыҳәаразы" адиплом лоуит.
Аицлабрақәа 11 хырхарҭа рыла имҩаԥган. Урҭ рхы рыладырхәит Урыстәыла арегионқәа зегьы рхаҭарнакцәа, Аԥсны, иара убас даҽа быжь-тәылак рхаҭарнакцәа: Белоруссиа, Азербаиџьан, Зимбабве, Катар, Никарагуа, Ермантәыла, Китаи.
Аԥснытәи алахәылацәа ралхреи рышьҭреи мҩаԥнагеит Аԥсны аҵара аминистрра.