Атрактор маҷқәа, амотоблокқәа, ахыбтә хархәагақәа аахәан Аԥсны ақыҭанхамҩа аминистрра ақыҭанхамҩа аҿиаразы хықәкылатәи апрограммала. Атехника аахәара зҵазкуа апрограмма аҳәаақәа ирҭагӡаны имҩаԥгоу аус, рхыдҵа анагӡара ахьынӡарылшаз, аамҭала аҽҳәара рыҽҭарыгӡама, иааидкыланы апрограмма аҿиашьа арадио Sputnik аефир аҟны далацәажәеит Ақыҭанхамҩа аминистрра амеханизациа аҟәша аиҳабы Асҭамыр Асланӡиа.
Ақыҭанхамҩа аҿиара хықәкылатәи апрограмма аҳәаақәа ирҭагӡаны акомиссиа иаднакылаз апроектқәа инарықәыршәаны анхацәа ирызшан амеханизациа маҷ иаҵанакуа ахархәагақәа.
Асланӡиа иажәақәа рыла, ашықәс алагамҭазы 540 проект ахьыҟаз акомиссиа иаднакылеит 349. Урҭ рыбжьара иҟан амеханизациа ала аиқәыршәара, аҵиаақәа реиҭаҳара, ашәыр аус адулара, арахә ааӡара уҳәа.
"Амеханизациа иадҳәалоу апроектқәа рыбжьара иҟоуп амеханизациа мацара, убасгьы аиҭаҳәатәқәа змоу рзы ицхыраагӡаны иҟоу. Амеханизациа иазку апроектқәа ирылахәуп 148-ҩык. 28 атрактор маҷқәа, иара убас атехника маҷ-амотоблок ҳәа изышьҭоу 111 цыра ыҟоуп. Нас атрактор амаҭәахәқәа, амотоблок иацрарҳәо амаҭәахәқәа, иааидкыланы 1300 инареиҳаны иҟоуп ацраҳәақәа. Амеханизациа иадҳәалоу апроектқәа зегьы идыртәоит 48 миллион 900 нызқь мааҭ инареиҳаны", - иҳәеит Асланӡиа.
Иара иазгәеиҭеит мчыбжьык иалагӡаны иҵегьы атехника ишазыԥшу.
Аицәажәара инеиҵыхны ишәаҳар шәылшоит аудиофаил аҟны хыхь.