АҞӘА, жьҭаара 31 - Sputnik. Ахәыҷтәы центр "Артек" Аҟәа акультура-усутә ҭыԥ Гәыма аҿы ацәыргақәҵа аанартит.
Ацәыргақәҵа ҩымш имҩаԥысуеит, 2025 шықәса рашәара 16 рзы иазгәаҭахо "Артек" ашьаҭаркра 100 шықәса ахыҵра иазкуп.
Аԥсны аҵара аминистр Инал Габлиа иазгәеиҭеит иааиуа аԥхынразы ареспублика ахәыҷқәа ари аныҳәа рхы шаладырхәуа. Аԥснынтәи "Артекҟа" ицараны иҟоу ахәыҷқәа Урыстәыла аҵара аминистр Сергеи Кравцов иҟынтәи ааԥхьара роухьеит.
Ацәыргақәҵа аҳәаақәа ирҭагӡаны имҩаԥгахоит арҿиаратә еицлабрақәа, аҟазаратә-классқәа, ахәмаррақәа, аҵаратә программақәа.
Аусмҩаԥгатә аиҿкааҩцәа – Аԥсны Аҵара аминистрреи Жәларбжьаратәи ахәыҷтәы центр "Артеки".