АҞӘА, абҵара 1 - Sputnik. Гагра иаатит V Жәларбжьаратәи атуристтә форум "Visit Apsny", ацәыргақәҵа "Apsny Horeca".
"Асимвол ҵакы амоуп абарҭ аҩымш рыҩнуҵҟа абизнес еилазаара, аҳәынҭқарратә усбарҭақәа, ауаажәларратә еиҿкаарақәа, хьӡы-ԥша змоу анапҟазаҩцәа, аекспертцәа злахәу афорум Гагра ақалақь аҿы иахьымҩаԥысуа. Гагра – Аԥсны мацара акәымкәа, асоветаамҭашьҭахьтәи аҵакыра зегь аҿы реиҳа иԥшӡоу, ауаа здызыԥхьало аҭыԥқәа иреиуоуп", — ҳәа азгәалҭеит араион ахада ихаҭыԥуаҩ Еҭери Кондакова.
"Visit Apsny" Урыстәылеи Аԥсни рҟынтәи 170-ҩык рҟынӡа атуристтә усхки анаплакреи рхаҭарнакцәа рхы аладырхәит. 20 наплакы инареиҳаны ацәыргақәҵа "Apsny Horeca" рхы аладырхәит, урҭ раалыҵқәа – ароботтә техника, арыжәтә џьбара, агаз злоу арыжәтә, аӡы, аҿырԥшӡагақәа, аџьемқәа, ашәыррҩа, акьыԥхьтә аалыҵқәа, асасааирҭақәа рзы амаҵзурақәа ӡырыргеит.
Аԥсны асасдкыларатә индустриа шыҿио еилыркаарц, урыстәылатәи аԥышәа иалацәажәарц V Жәларбжьаратәи Афорум "Visit Apsny" ахь иааит Урыстәылантәи аекспертцәа, абри атәы иҳәеит Асасдкыларатә усхк аҟны Азеиԥшмилаҭтә Еидгыла ахада Алексеи Волков.
Иара иҳәеит Урыстәыла иахьа атуризм аиндустриа мацара арҿиара ишадҳәалам, аинвестициатә идеиақәа шырацәоу, убри азы Аԥсни Урыстәылеи реидгылара шаҭаху.
Ахәбатәи Жәларбжьаратәи Афорум "Visit Apsny" Аԥсны абҵара 1,2 рзы имҩаԥысуеит. Афорум атема – "Аԥсны аиҭарҿыцра: 2025 шықәсазы аицлабра шалшо". Sputnik Аԥсны афорум информациатә партниор хадас иҟоуп.