АҞӘА, абҵара 7 - Sputnik. Аԥснытәи амҵәышәымпыл 100 шықәса ахыҵра иазкыз агәырӷьаратә усмҩаԥгатә мҩаԥысит Аҟәа.
Аԥсны ахада Аслан Бжьаниа аспортсменцәеи азыҟаҵаҩцәеи дрыдныҳәалеит.
"Аԥсуа мҵәышәымпыл шәышықәса ахыҵра шәыдысныҳәалоит. Ари акырзҵазкуа хҭысуп ахәмарҩцәеи, азыҟаҵаҩцәеи, абзиабаҩцәеи, иааидкылан амилаҭтә спорт зегьы рзы. Агәахәара унаҭоит жәашықәсала ҳтәылаҿы ари аспорттә хкы аҭоурых аиқәырхара ахьалшаз" — ҳәа азгәеиҭеит аҳәынҭқарра ахада.
Иара убас, Аԥсны аҿари аспорти русқәа рзы аҳәынҭеилакы ахантәаҩы Ҭарашь Ҳагба Аԥсны амҵәышәымпыл шәышықәса ахыҵра иазку аусмҩаԥгатә аҿы адныҳәаларатә ажәахә ҟаиҵеит.
"Сара алшара сымоуп аныҳәа ду – Аԥснытәи амҵәышәымпыл шәышықәса ахыҵра шәыдысныҳәаларц. Шәышықәса ҳхыҵит, жәаҳәарада, аизҳарақәеи аиҵахарақәеи ҳархысхьеит. Аха ҳара ҳзы ауадаҩра дуқәа аныҟазгьы ҳааигәа иҟан ауаа, ԥхьаҟа ацаразы иҳацхраауаз, иҳавагылаз", — ҳәа азгәеиҭеит иара.
Ҳагба иҳәеит Александр Седов, Владимир Ҳашба реиԥш иҟоу зҟазара ҳараку азыҟаҵаҩцәа рыда иарбанзаалак аспорт хкы аҿиара шзалымшо.
Еицырдыруа Аԥсны ашьапылампыл ааӡамҭа Никита Симониани амҵәышәмпыл аеҵәахә, Урыстәыла амҵәышәмпыл Афедерациа ахада Андреи Кириленкои ареспублика аспортсменцәа аԥснытәи амҵәышәмпыл шәышықәса ахыҵра рыдырныҳәалеит.
Аԥсны Амҵәышәымпыл афедерациа ахада Ерасҭ Агәмааи Урыстәыла Амҵәышәымпыл афедерациа анагӡаратә напхгаҩы Владимир Диачоки аусеицуразы Амеморандум рнапы аҵарҩит.
Иара убасгьы Аԥсни Аахыҵ Уаԥстәылеи Амҵәышәымпыл азы рфедерациақәеи Урыстәылеи Аахыҵ Уаԥстәылеи р-Федерациақәеи аиқәшаҳаҭрақәа рыбжьарҵеит.
Аиԥылара рхы аладырхәит ареспублика аспорттә еилазаара, Урыстәылеи Аахыҵ Уаԥстәылеи рҟынтәи амҵәышәымпыл азы Афедерациақәа рнапхгаҩцәа.
Раԥхьаӡа амҵәышәмпыл асырҭа Аҟәа иаадыртит 1924 шықәсазы. Убри инаркны амҵәышәмпыл Аԥсны аспорттә ԥсҭазаара иахәҭакны иҟалеит, еиҿкаахеит амҵәышәмпыл азы амилаҭтә школ, ареспублика аспортсменцәа Асоветеидгылазегьтәи аицлабрақәа рхы рыладырхәуан.