АҞӘА, абҵара 15 - Sputnik. Аҟәа, аҿагыларатә акциақәа раан 13-ҩык аахақәа роуит, абри атәы Sputnik иазеиҭарҳәеит Аԥсны агәабзиарахьчара аминистрраҟны.
Хҩык ахәшәтәырҭаҿы ишьҭоуп, урҭ рыԥсҭазаара ашәарҭара иҭагылам. Егьырҭ амбулатортә хәышәтәра иахысуеит.
Аҿагыларатә акциа алахәылацәа уажәыгь Аслан Бжьаниа ԥхьатәара дцароуп ҳәа ирԥхьаӡоит.
Аоппозициатә мчрақәа иаԥырҵаз Акоординациатә хеилак ахаҭарнакцәа ишаарыцҳауа ала, аҳәынҭқарра ахада арҭ адҵақәа еилыркаауп.
Аганқәа алацәажәеит аҳәынҭқарра ахада инапынҵақәа назыгӡаша акандидатура. Амчра адгылаҩцәа атәыла ахада ихаҭыԥуаҩ Бадра Гәынба ари амаҵураҿы даанрыжьырц ажәалагала ҟарҵеит.
Аоппозициаа атәыла ахада инапынҵақәа Апарламент аиҳабы Лаша Ашәба инеигӡаларц рҳәоит, ма аҩ-ганк зықәшаҳаҭхаша аҽа кандидатк далхзарц.