"Асубтропикатә ҵиааӡара иҭышәынтәалоу аҿиара аҭҵаарадырратә дгылара аҭара" захьӡу Жәларбжьаратәи аҭҵаарадырра-практикатә конференциа мҩаԥысуеит арҭ амшқәа рзы аҳҭнықалақь аҟны. Уи еиҿкаауп Аҟәатәи абаҳчатә қыҭанхамҩатә станциа аԥҵара 130 шықәса ахыҵреи Аҭҵаарадыррақәа ракадемиа ақыҭанхамҩа аинститут аԥҵара 30 шықәса ахыҵреи инарымаданы. Аконференциа иалахәуп аԥсуеи аурыс ҵарауааи, имҩаԥысуеит абҵара 16-нӡа. Ақыҭанхамҩатә институт аусзуҩы, ақыҭанхамҩатә ҭҵаарадыррақәа ркандидат Дмитри Сабекьиа еиҭеиҳәеит аконференциаҿы иажәахә зызку, ас еиԥш аусмҩаԥгатә лҵшәас иаанашьҭыр алшо.
Аҵарауаҩ иажәахә азкуп Аԥсны ацитрус шәырқәа иахьатәи рҭагылазаашьа, рырҿиара, ԥхьаҟатәи рԥеиԥш. Ари азҵаарала иара аҭҵааратә ус мҩаԥигон.
"Асовет Еидгыла анеилаҳа ашьҭахь ацитрус шәырқәа рганахьала Аԥсны аҭҵааратә ус мҩаԥгамызт. Уи аахыс иахьанӡа аҭагылазаашьа азгәаҭаны алкаақәа ҟаҵан. Уахь иаҵанакуеит Аԥсны иаҳа аперспектива змоу ацитрус шәырхкқәа еиқәырханы аколлекциа аҳасабала аума, ахатә баҳчақәа рҿы аума иаанханы иҟоу. Насгьы есышықәса ҳтәылаҿы иаадрыхуа астатистика, ахкқәа рхаҭабзиара, иаҳа еиӷьу алкааны ахархәара роурц ажәлар ирыдаҳгалаша азгәаҭан. Инаскьаганы иҟало ацитрус шәырқәа рыхкқәа ҳаман, аха уажәы заанҵы иҟало ахкқәа рахь ҳаиасуеит. Сара схаҭа исымоуп ахкқәа илысхыз, иаҳҳәап "Аолимпиатә" ҳәа ҳзышьҭоу. Насгьы ишьақәҳаргылахьеит иаҳцәыӡны иҟаз. Уажәшьҭа ацитрус шәырқәа ирыҵанакуа аколлекциа ицәгьамкәа ишьақәыргыланы иҳамоуп, аԥхьаҟа хәарҭара аманы ахархәара амазарц аҭҵаарадыррақәа мҩаԥган", - иҳәеит Сабекьиа.
Аицәажәара инеиҵыхны ишәаҳар шәылшоит аудиофаил аҟны хыхь.