АҞӘА, абҵара 20 - Sputnik. Аԥсны ахада иалхра мҩаԥысроуп 2025 шықәса жәабранмза 19 рҟынӡа ҳәа Sputnik иазеиҭарҳәеит Ацентртә алхратә комиссиаҟны.
Аԥсны азакәанԥҵара инақәыршәаны Жәлар Реизара алхрақәа рымҩаԥысра амш рыланаҳәароуп Аҳәынҭқарра ахада имаҵураҭыԥ анаанижь аҽны инаркны 15 мшы ирхымгакәа. Алхрақәа мҩаԥысроуп ԥхьатәарацара амш инаркны хымз рыҩнуҵҟа.
Акомиссиа иазгәанаҭеит, аҳәынҭқарра ахада заанаҵы инапынҵақәа шьҭеимҵазҭгьы аҳәынҭқарра ахада иалхрақәа 2025 шықәса ажьырныҳәамза 23 инаркны хәажәкырамза 23 рҟынӡа имҩаԥысраны ишыҟаз, атәыла ахада Аслан Бжьаниа иҿҳәара анҵәара инадҳәаланы.
Заанаҵтәи аҳәынҭқарра ахада иалхрақәа рымҩаԥгара арыцхә аамҭа кьаҿк иалагӡаны апарламент аилатәараҿы ишьақәыргылахоит ҳәа Sputnik иазеиҭеиҳәеит Жәлар Реизара адепутат Дауҭ Хәытаба.
Иара убас, Хәытаба иазгәеиҭеит Аԥсны ахада иалхрақәа жәабранмзазы имҩаԥгахар шалшо. Иара иажәақәа рыла, иаарласны аӡбара рыдыркылароуп, Ацентртә алхратә комиссиа аҽазыҟаҵарақәа рымҩаԥгаразы аамҭа аиурц азы.