АҞӘА, абҵара 20 - Sputnik. Урыстәылантәи иаауа афымцамч ахә ахшәаауп абҵара 22 рҟынӡа ҳәа аанацҳауеит атәыла ахада ипресс-маҵзура.
Аҳәынҭқарра ахада инапынҵақәа назыгӡо Бадра Гәынба ари азҵаара далацәажәеит аԥыза-министр ихаҭыԥуаа Аенергетикеи атранспорти рминистр Џьансыхә Нанбеи, аекономика аминистр Кристина Озгани, афинансқәа рминистр Владимир Делбеи алархәны имаԥигаз аилатәараҟны.
Гәынба анапынҵа ҟаиҵеит анаҩстәи ашәарақәа рзы аԥара рыԥшаарц.
Урыстәылантәи Аԥсныҟа афымцамч аиура иалагеит абҵара 1 инаркны. Уи аҽныҵәҟьа Аԥсны иалагалан ԥшь-сааҭктәи алашара арцәара аамҭеихша.
Абҵара 16 рзы Аԥсны уаанӡатәи ахада Тамшь имҩаԥигаз аилатәараҟны афымцамч азы аҭагылазаашьа ҭышәынтәалоуп ҳәа аҳәамҭа ҟаиҵеит Афымцамчи атранспорти рминистр Џьансыхә Нанба.
Иазгәеиҭеит абҵара 22 рзы 650 миллион мааҭ рҟынӡа аԥара шшәатәу ашықәс нҵәаанӡа Аԥсны фымцамчыла аиқәыршәаразы.