АҞӘА, абҵара 21- Sputnik, Бадраҟ Аҩӡба. РУСДРАМ аҟны 43-тәи атеатртә сезон ақәҿиара дуқәа аманы имҩаԥысуеит иҳәеит атеатр адиректор хада Иракли Хынҭәба.
Иара имҩаԥигаз апресс-конференциаҿы инаҵшьны иазгәеиҭеит, уаанӡатәи асезон иаҿырԥшны ари асезон азы Аԥсны аҩнуҵҟеиԥш уи анҭыҵгьы атеатр ахәаԥшцәа рхыԥхьаӡара 40% ишеиҳахаз.
"Асезон макьана ихыркәшаӡам, уи ԥхынҷкәынмзазы ихыркәшахоит. Ҳара иахьа уажәраанӡа 252 арепертуартә спектакль ықәҳаргылахьеит. Уаанӡа ишысҳәахьаз еиԥш, аспектакльқәа рахь ахәаԥшцәа даара аинтерес ду аадырԥшуеит, ақәҿиара дуқәа рыманы имҩаԥысуеит", — азгәеиҭеит Хынҭәба.
Хынҭәба иажәақәа рыла, Шьепкин ихьӡ зху атеатртә институт аҿы аҵара зҵо Аԥснытәи астудент ҿарацәа Фазиль Искандер иҩымҭа "Ауаҩи уи икәша-мыкәшеи" иалху аспектакль ддырбараны иҟоуп. Ԥхынҷкәын 2 рзы РУСДРАМ асценаҟны имҩаԥгахоит Урыстәыла Атеатр Маҷ аҿы иаԥҵоу Шьепкин ихьӡ зху Иреиҳаӡоу атеатртә институт агастрольқәа.
Ԥхынҷкәын 2 рзы 43-тәи атеатртә сезонгьы ааркхоит, ахәаԥшцәа рыбжьыҭирала аихшьаалақәагьы ҟаҵахоит.
Ԥхынҷкәын 27 рзы РУСДРАМ асценаҟны иқәыргылахоит Самуил Маршак илакә "12 мзы"иалхны ашықәсҿыцазтәи аспектакль, арежиссиор Џьамбул Жорданиа. Атеатр ашықәсҿыцазтәи апрограмма ҭбаауп — ԥхынҷкәын 31 инаркны идырбахоит РУСДРАМ иреиӷьу аспектакльқәа, ашықәс ҿыц ауха — "Оскар". Ажьырныҳәа 2 инаркны 12 рҟынӡа асааҭ 19:00 рзы есыҽны аспектакльқәа ихәмарлоит иҳәеит Хынҭәба.