АҞӘА, абҵара 23 - Sputnik. Аԥсны ахада инапынҵақәа назыгӡо Бадра Гәынба Венесуела ахада Николас Мадуро 62 шықәса ихыҵра идиныҳәалеит ҳәа аанацҳауеит атәыла ахада ипресс-маҵзура.
Гәынба иазгәеиҭеит Мадуро иполитикатә ԥышәеи Венесуела амилаҭтә интересқәа адунеизегьтәи аренаҿы хамеигӡарыла рыхьчареи ртәы.
"Ҳара аҵак ду раҳҭоит ҳҳәынҭқаррақәа рыбжьара иҿиаз аҩызаратәи аиашьаратәи еизыҟазаашьақәа. Аԥсни Венесуелеи рыбжьара астратегиатә еиҩызара арӷәӷәараҿы шәара хаҭала шәлагала ду ахә ашьара уадаҩуп. Ҳақәгәыӷоит ҳаҩызаратә усеицура анаҩсгьы иацҵахап ҳәа ", — аҳәоит атекст аҟны.
Бадра Гәынба Николас Мадуро изеиӷьаишьеит агәабзиара, аизҳазыӷьара, аҳәынҭқарра анаԥхгаратә усураҿы аринахысгьы ақәҿиарақәа.