АҞӘА, абҵара 25 — Sputnik. Аԥсны ахада инапынҵақәа назыгӡо Бадра Гәынба иқәымчырц аҽазышәарақәа ыҟоуп ҳәа аҳәамҭа ҟаиҵеит Апрокурор хада Адгәыр Агрба.
Иахьа Апрокуратура хада аҿаԥхьа еизеит Агрба адгылара изҭо ауаа.
Апрокурор хада иажәақәа рыла, Жәлар Реизара адепутат Кан Кәарҷиа атәыла ахада инапынҵақәа назыгӡо Бадра Гәынба диқәымчуеит, иара идицалоит Адгәыр Агрба апрокурор хада иаҳасабала икандидатура Апарламент аҿаԥхьа ықәимыргыларц, Агрба иазгәеиҭеит Кәарҷиа ишиҳәаз "даҽакала ианыҟала еиҭах ауаа реидкылара ҳақәшәоит" ҳәа.
Апрокурор хада инапынҵақәа рыҿҳәара нҵәоит ԥхынҷкәын 12 рзы.